Sūtra ३.३.१२

अत एव तृतीये अध्याये तृतीय-पादे सूत्र-कारैर् अपि, आनन्दादयः प्रधानस्य [वे.सू. ३.३.११] इत्य् अनेनानन्दादीनाम् एकत्रोक्तानाम् अपि सर्वत्रोपासनायां समाहृतिश् चिन्तिता । प्रियादीनां तु सा परिहृता । प्रिय-शिरस् त्व् आद्य-प्राप्तिर् उपचयापचयौ हि भेदे [वे.सू. ३.३.१२] इत्य् अनेन तत्रैकस्यैवान्नमयादि-क्रमोपासकस्य उपासना भूमिकारोह-स्थान-भेदे हि प्रियादि-शब्दस् तस्यैव आनन्द-मयस्य ब्रह्मणः उदयोपचयापचयौ विवक्षितौ । ततो नान्यत्रोपासनायां तेषाम् आनन्दामयः प्रधानस्य इति न्यायेन प्राप्तिर् इत्य् अर्थः ।